 കാസര്‍കോട്: ബേഡഡുക്ക-കുറ്റിക്കോല്‍ സംയുക്ത മഹല്ല് ജമാഅത്തുകളുടെ ഖാസിയായി പ്രമുഖ പണ്ഡിതനും സമസ്ത കേരള ജംഇയ്യത്തുല്‍ ഉലമാ കേന്ദ്ര മുശാവറ അംഗവുമായ സയ്യിദ് മുഹമ്മദ് ഉമറുല്‍ ഫാറൂഖ് അല്‍ബുഖാരി പൊസോട്ട് ഇന്ന് ചുതമലയേല്‍ക്കും. ഇന്ന് വൈകുന്നേരം മൂന്നുമണിക്ക് കുണ്ടംകുഴി ജുമാ മസ്ജിദിനു സമീപം നടക്കുന്ന ചടങ്ങില്‍ മഹല്ല് പ്രതിനിധികള്‍ പൊസോട്ട് തങ്ങളെ ബൈഅത്ത് ചെയ്യും. ചെമ്പിരിക്ക ഖാസി സി എം അബ്ദുല്ല മൌലവിയുടെ മരണത്തെ തുടര്‍ന്നാണ് മലയോര മേഖല പൊസോട്ട് തങ്ങളെ ഖാസിയായി നിശ്ചയിച്ചത്. പാണക്കാട് സയ്യിദ് ശിഹാബ് ആറ്റക്കോയ തങ്ങള്‍ തലപ്പാവ് അണിയിക്കും. സയ്യിദ് ഫസല്‍ കോയമ്മ തങ്ങള്‍ കുറാ പ്രാര്‍ഥനക്ക് നേതൃത്വം നല്‍കും. ആലംപാടി എ എം കുഞ്ഞബ്ദുല്ല മുസ്ലിയാര്‍ ഷാളണിയിക്കും. സ്ഥാനാരോഹണ ചടങ്ങ് സമസ്ത കേന്ദ്ര മുശാവറ അംഗം എം ആലിക്കുഞ്ഞി മുസ്ലിയാരുടെ അധ്യക്ഷതയില്‍ ഉഡുപ്പി ഖാസി ബേക്കല്‍ ഇബ്റാഹിം മുസ്ലിയാര്‍ ഉദ്ഘാടനം ചെയ്യും. പ്രമുഖ സാദാത്തുക്കളും പണ്ഡിത•ാരും സംബന്ധിക്കും. കുണ്ടംകുഴി ജമാഅത്ത് വൈസ് പ്രസിഡന്റ് സി എം അബൂബക്കര്‍ ഹാജിയുടെ അധ്യക്ഷതയില്‍ കുണ്ടംകുഴി മദ്റസയില്‍ ചേര്‍ന്ന സംയുക്ത ജമാഅത്ത് മഹല്ല് പ്രതിനിധികളുടെ യോഗമാണ് തങ്ങളെ ബൈഅത്ത് ചെയ്യാന്‍ തീരുമാനിച്ചത്. നേരത്തെ ജമാഅത്ത് കമ്മിറ്റി ചേര്‍ന്ന് പ്രതിനിധികളെ ചുമതലപ്പെടുത്തിയിരുന്നു. വിവിധ മഹല്ലുകളെ പ്രതിനിധീകരിച്ച് സി എ മുഹമ്മദ് കുണ്ടംകുഴി, അബ്ബാസ് അന്‍വരി മരുതടുക്കം, മൊയ്തീന്‍ മുനമ്പം, അസ്ലം ബാവിക്കരയടുക്കം, ഇബ്റാഹിം കാട്ടിപ്പാറ, ഇബ്റാഹിം തലേക്കുന്ന്, അബ്ദുറഹ്മാന്‍ മൂന്നാംകടവ്, ഇസ്മാഈല്‍ കരിവേടകം, സി എ അബ്ബാസ് ചേടിക്കുണ്ട് തുടങ്ങിയവര്‍ ചര്‍ച്ചയില്‍ പങ്കെടുത്തു. നിയുക്ത ഖാസിയായ സയ്യിദ് മുഹമ്മദ് ഉമറുല്‍ ഫാറൂഖ് അല്‍ബുഖാരി നിലവില്‍ കടലുണ്ടി ഖാസി, മഞ്ചേശ്വരം മള്ഹര്‍ ചെയര്‍മാന്‍, ജാമിഅ സഅദിയ്യ അറബിയ്യ വൈസ് പ്രസിഡന്റ്, സമസ്ത ജില്ലാ ജനറല്‍ സെക്രട്ടറി തുടങ്ങിയ സ്ഥാനങ്ങളും വഹിക്കുന്നുണ്ട്. കര്‍ണാടകയിലും വിവിധ സ്ഥാപനങ്ങളുടെ സാരഥ്യം വഹിക്കുന്നുണ്ട്. 1961 സപ്തംബര്‍ 21ന് കോഴിക്കോട് ജില്ലയിലെ കടലുണ്ടിയില്‍ ജനിച്ച തങ്ങള്‍ പ്രമുഖ പണ്ഡിതനും ആത്മീയനായകനുമായ പിതാവ് സയ്യിദ് അഹമ്മദ് ബുഖാരിയില്‍ നിന്ന് പ്രാഥമിക മതവിജ്ഞാനം നേടി. നന്നേ ചെറുപ്പത്തില്‍ തന്നെ മതവിജ്ഞാനത്തിന്റെ ഉന്നത മേഖലകളിലെത്തിയ തങ്ങള്‍ കോടമ്പുഴ ദര്‍സില്‍ ബീരാന്‍ കോയ മുസ്ലിയാരുടെ ആത്മീയ ശിക്ഷണത്തില്‍ ദര്‍സ് പഠനം പൂര്‍ത്തിയാക്കി. 83ല്‍ വെല്ലൂര്‍ ബാഖിയാത്തില്‍ നിന്നും ബാഖവി ബിരുദം നേടി പുറത്തിറങ്ങി. കാല്‍നൂറ്റാണ്ടുമുമ്പ് പൊസോട്ട് ജുമാ മസ്ജിദില്‍ മുദരീസായി സേവനം തുടങ്ങിയതോടെ കര്‍മരംഗം കാസര്‍കോടായി. പൊസോട്ട് തങ്ങള്‍ എന്ന പേരില്‍ ആത്മീയ മേഖലകളില്‍ നിറസാന്നിധ്യമായ തങ്ങള്‍ പ്രഭാഷകന്‍, സംഘാടകന്‍ എന്നീ നിലകളിലും വ്യക്തിമുദ്ര പതിപ്പിച്ചു. ആയിരക്കണക്കിനു ആത്മീയ വേദികള്‍ക്കു നേതൃത്വം നല്‍കിവരുന്നു. ഖാസിയായി ചുമതലയേല്‍ക്കുന്നതിന് വ്യാഴാഴ്ച കുണ്ടംകുഴിയിലെത്തുന്ന തങ്ങള്‍ക്ക് വിവിധ മഹല്ല് പ്രതിനിധികള്‍ ഗംഭീര വരവേല്‍പ്പ് നല്‍കും. |
No comments:
Post a Comment
thank you my dear friend